Інфармацыя пра часопіс "Роднае слова" і гісторыя яго стварэння
Сённяшні выгляд часопіса.
Часопіс створаны ў 1987 г. як штомесячнае навуковае і метадычнае выданне для настаўнікаў-беларусістаў. Пачаў выходзіць у студзені 1988 г. Першапачатковая назва – "Беларуская мова і літаратура ў школе", у 1992 г. перарэгістраваны як "Роднае слова". З 1 ліпеня 2001 г. рэдакцыя часопіса дзейнічае самастойна як Установа «Рэдакцыя часопіса "Роднае слова"». За 20 гадоў выдадзена больш за 2,9 млн. экз.; у сярэдзіне 1990‑х гг. часопіс меў найбольшы тыраж – больш за 10 тыс. экз.
"Роднае слова" – сацыяльна значнае выданне Рэспублікі Беларусь, на старонках якога друкуюцца літаратуразнаўчыя і мовазнаўчыя артыкулы, матэрыялы па сусветнай і нацыянальнай культуры. Часопіс змяшчае матэрыялы, якія дапамагаюць выкладаць літаратуру і мову ў арганічнай сувязі з нацыянальнай і айчыннай культурай. Педагогам адрасаваны цыклы артыкулаў пра ўвасабленне мастацкіх твораў беларускай літаратуры ў музыцы, выяўленчым, тэле- і кінамастацтве, што спрыяюць фарміраванню эстэтычна-этычнай культуры моладзі.
У часопісе змяшчаюцца метадычныя матэрыялы, распрацоўкі ўрокаў, псіхалагічна-педагагічныя рэкамендацыі, настаўніцкія нататкі, адрасы педагагічнага майстэрства, сцэнары да юбілейных датаў пісьменнікаў, памятных дзён і святаў краіны, да школьных мерапрыемстваў, адлюстроўваюцца вопыт і дасягненні педагогаў краіны, друкуюцца матэрыялы для падрыхтоўкі да алімпіяд рознага ўзроўню, цэнтралізаванага тэсціравання, выпускных экзаменаў у школе і ўступных у ВНУ, да напісання рэфератаў і сачыненняў. Для заняткаў па мове, напрыклад, арганізаваны разнастайны займальны матэрыял, які друкуецца пад рубрыкамі "З гісторыі слоў", "Лінгвістычныя заданні", "Старонка маладога лінгвіста", "З гісторыі часцін мовы, знакаў прыпынку" і інш. Беларуская мова асвятляецца ў кантэксце еўрапейскіх моў, і найперш славянскіх. Упершыню змешчаны слоўнікі імёнаў і прозвішчаў англійскіх, амерыканскіх, аўстралійскіх, нямецкіх дзеячаў культуры (пісьменнікаў, мастакоў, кампазітараў), а таксама слоўнікі тапонімаў у перакладзе на беларускую мову.
Часопіс "Роднае слова" належыць да тых перыядычных беларускамоўных выданняў гуманітарна-асветніцкага кірунку, якія істотна дапамагаюць ў станаўленні нацыянальнай самасвядомасці, далучэнні маладога пакалення да беларускай і сусветнай духоўна-культурнай спадчыны.
Рашэннем калегій Вышэйшай атэстацыйнай камісіі часопіс уключаны ў Пералік навуковых выданняў Рэспублікі Беларусь для апублікавання вынікаў дысертацыйных даследаванняў па філалагічных і педагагічных навуках (тэорыя і методыка навучання беларускай мове і літаратуры), мастацтвазнаўстве і культуралогіі.
Часопіс "Роднае слова" – лаўрэат IV Нацыянальнага конкурсу друкаваных сродкаў масавай інфармацыі "Золотая литера" ў намінацыі "Лепшы навуковы, навукова-папулярны часопіс" (2008).